تخطى إلى المحتوى
عن الرسلي — عبدالرسول شكرالله
عبدالرسول شكرالله — معروف باسم الرسلي — محاسب وحاصل على ماجستير إدارة أعمال، يشرح إدارة الفلوس والاستثمار بالعربية منذ ٢٠١٤. يقيم عبدالرسول في البحرين، ويشرح القرارات المالية التي يواجهها الناس في المنطقة، من إدارة الراتب والديون إلى الادخار وبناء المحفظة الاستثمارية. يقدّم دورة «الاستثمار من الصفر» بـ ٣٨١ طالب، و٧ أدوات حسابية مجانية، وجلسات تدريب مالي شخصي.
بديت من البقالة
كنت صغير، وكنت أوقف قدام رف الحلويات في البقالة. أشوف اللي أبيه، وأعرف إن ما فيه.
عائلتي كانت على دخل محدود. مب قصة حرمان — قصة إن كل دينار له حساب.
بعدين شفت أبوي يسوي المستحيل
أبوي — رحمه الله — ما زاد راتبه فجأة. اللي سواه إنه رتّب فلوسه، وشتغل ساعات إضافية، لدرجة إنه اشتغل ١٢ ساعة متواصلة، عشان يوفّر لعائلته حياة مرتاحة.
وأنا شفت بعيني عائلة تنتقل من مستوى لمستوى. مب بحظ، ولا بمبلغ نزل من السما. بقرارات.
هذي أول مرة أفهم إن الوضع المالي شي يتغيّر، مب شي مكتوب عليك.
وبعدين شفت شي ما فهمته وقتها
بديت أشتغل وعمري ١٨، أول ما خلصت الثانوية. براتب مبتدئ، وكنت أساعد أهلي.
وحولي ناس على نفس الراتب بالضبط. نفس المستوى، نفس الظروف.
واحد منهم متعثر، والثاني مرتاح — مب غني، بس مرتاح.
نفس الدخل، ونتيجة مختلفة تماماً.
هذا السؤال ظل معاي سنين: شنو الفرق بينهم؟
درست محاسبة، ولقيت نص الجواب
يوم تخرجت، انتبهت لشي بسيط بس غيّر تفكيري: الفلوس ما تنُدار بس في الشركات. الشخص العادي يقدر يدير فلوسه بنفس الطريقة.
وهنا بدت الرحلة، سنة ٢٠١٤.
وباقي الجواب كان في كلمتين
المسألة مب كم تدخل. المسألة كم يبقى.
تقلل، توفّر، وبعدين تسأل السؤال اللي لازم تسأله: كيف أكبّر اللي وفّرته؟
وهني دخلت عالم الاستثمار.
كنت غلطان في شي مهم
أول ما سمعت عن الاستثمار، كان في بالي إنه للأغنياء اللي يشترون شركات.
اليوم أعرف إنه العكس تماماً. الاستثمار للي يقدر يوفّر — أي أحد. وهو الطريقة اللي تخليك تستمر في وظيفتك وحياتك، وفلوسك تشتغل لك، بدون ما تفتح مشروع.
اليوم
عندي شهادة محاسبة وماجستير إدارة أعمال. بس اللي أعلّمه مب من الكتب فقط — أنا عشته.
شفت الانتقال من مستوى لمستوى بعيني، وسويته بنفسي.
وهدفي واضح: أوصل أنا وعائلتي للمستوى المالي الجاي. وأخذ معاي كل واحد يبي نفس الشي.
اختصاراً
- محاسب، حاصل على ماجستير إدارة الأعمال من جامعة البحرين
- بكالوريوس الأعمال (المحاسبة) من بوليتكنك البحرين
- حاصل على شهادة المحاسب الإداري المعتمد (CMA)
- رئيس ومؤسس مشارك لفرع البحرين من معهد المحاسبين الإداريين (IMA)
- رئيس الشؤون التجارية في شركة خدمات مطار البحرين (BAS)
- بديت في التمويل الشخصي سنة ٢٠١٤
- ٤٠٠+ شخص بدوا رحلتهم في الاستثمار
- ٢٠٠+ محفظة استثمارية تمّت مراجعتها
- ١٥٠+ ميزانية وخطة مالية شخصية
- ٣٨١ طالب في دورة الاستثمار من الصفر
- @alrasly — انستقرام ٧ آلاف · تيك توك ٧ آلاف · يوتيوب
- من البحرين
معاك الرسلي — أشرح الفلوس بلغة بسيطة.
